Då Ivar Aasen døydde i 1896, arva slekta hans på Sunnmøre alle tinga og bøkene som var att etter han. I denne nettutstillinga er det plukka ut 20 av Aasens gjenstandar. Bilete av desse blei gitt til eit utval forfattarar, som har skrive kvar sine tekstar til bileta, og gjennom dette gitt nytt liv til gjenstandane. Det er også skrive kulturhistoriske tekstar om kvar gjenstand, og Ivar Aasens eigne tekstar om gjenstandane ligg ved. Summen av dette håpar vi både vil overraske og skape ny forståing for kven Ivar Aasen var.

Mange vaksne i dag hugsar dei raude stereoskop, der ein kunne klikke fram bilete frå ein rund biletdisk. Men visste du at stereoskop også var ein ting på 1800-talet? Aasen hadde ein slik biletbetraktarar som hadde kjøpte bilete til, og slik ikkje berre fekk verda inn i stova, men også tredimensjonalt. «Auga er den rastlause moderniseringsagenten i mennesket si historie - janusdøra der ei røynd går ut og ei anna inn,» skriv Einar Økland i den skjønnlitterære teksten til denne gjenstanden.

Kvar gjenstand blir presentert med ein skjønnlitterær tekst, ein sakprosatekst og Aasens eigne ord om den aktuelle gjenstanden i dagbøker og brev. Nettutstillinga er dermed ein inngang både til tema rundt sjangerbruk og samansette tekstar, og òg ein historisk inngang til 1800-talet gjennom konkrete gjenstandar. Kva kan til dømes Aasens raude topphue og bowlerhatt fortelje om bruk av hovudplagg på Aasens tid?