Smie fra nørdre Sletto i Hovet

Denne smia er frå Nordre Sletto, gnr. 40, bnr. 10, i Hovet. Smia er truleg bygd kring 1780, og er sett opp av dåverande eigar Pål Sveinson Sletto (1748-1814), i følgje Halvor J. Berg. Smia vart sett opp litt nord for stova, og det var Halvor J. Berg som i si tid gav smia til Hol Bygdemuseum, kor den vart sett opp i 1934. Smia er tømra, har jordgolv og torvtak, og er skeivt rausta.

Dei fleste gardane hadde eige smie før i tida, og den blei brukt til det smiearbeidet som det var behov for på garden. Ofte va dette reparasjonsarbeid på jarnreiskapane. Pål Sveinson Sletto skal ha vore ein flink smed, og dersom nokon var i beit for haldhakar, navrar og liknande gjekk han ofte i smia og gav dei. Han laga kister med jødning, og dørajødninga i Torjushagen bar bokstavane hans. I tillegg laga han låsar.