Staller med trev fra Dalen i Hovet

Stallen med fôrtrev er frå Dalen, gnr. 32, bnr. 19, i Hovet. Stallen er truleg bygd kring 1805/1810, og kom til Hol Bygdemuseum kring 1960.

Stallen har to rom i fyrste høgda, ein hestestall og ein sauestall. I andre høgda er det fôrtrev, slik det vanlege var. På fôrtrevet køyrde dei det finaste fôret til hesten. Den er tømra, har fått bordtak i nyare tid og det er lagt golv i fyrste høgda. Tidlegare har det truleg vore jordgolv her.

Dei gamle gardshusa i Dalen vart sumaren 1959 lånt ut til 150-årsjubileumsutstillinga til Selskapet for Norges Vel på Ekeberg ved Oslo, kalla «Oppigard». Oliva Olsdotter Dalen (f. 1894) og Knut Knutson Trøen Dalen (f. 1888), og Guro Andresdotter Lerberg (1886-1962) og Stein Steinson Villand (1886) frå Nordre Villand, var heile tida med der for å fortelje om og vise korleis livet og arbeidet på ein slik hallinggard var. Etter utstillinga vart husa selde til disp. Rolf Brauer i Oslo, som flytte dei til Brandbu i Oppland til feriestaden sin der. Utvendig var dei uforandra. Stallen derimot kom til Hol Bygdemuseum, og etter avtale med eigaren (seljaren) Ola K. Dalen (f. 1916), kosta museet transporten av stallen tilbake til Hol.