Halvportett av Alexander Seippel, utført av målaren Eivind Engebretsen (1890-1960) Oslo, i 1916. Seippel er kledd i galla og har på seg medalja som riddar av 1. klasse av St. Olavs Orden.
Måleriet er innramme i ei 7 cm gullmåla treramme med ornament i hjørna.
"Alexander Seippel var professor i semittiske språk ved universitetet i Kristiania i meir enn 35 år. Gjennom sine omsetjingar av Bibelen kom han til å bli den som meir enn nokon annan forma ut det nynorske bibelmålet.
Seippels far kom som ung mann frå Tyskland til onkelen sin i Kristiansand, trelast- og kornhandlaren Gottlieb Ferdinand Reinhardt, som hadde kome til byen 1807 for å ordna med eit av familiens skip som hadde forlist og hamna i Kristiansand. Reinhardt vart verande og bygde opp stor forretning i byen, og han ordna det slik at nevøen fekk midlar til å opna eiga forretning. Men det gjekk dårleg, og Reinhardt skikka Ferdinand med kone og tre små barn opp til Frøysnes i Setesdal, der han skulle vera verkstyrar for ei storstilt planlagd kopparutvinning som Reinhardt hadde investert i. Kopparverket i Setesdal kom aldri i skikkeleg drift, men det førte i alle fall til at Alexander Seippel hadde sine beste barneår på Frøysnes (i same huset som Hans E. Kinck voks opp, seinare på 1800-talet). 1860 sende familien niåringen til katedralskolen i Kristiansand, men i alle feriar var Alexander heime på Frøysnes.
Seippels viktigaste vitskaplege innsats var at han samla og systematiserte omtalar av nordiske forhold i arabiske kjelder. Verket kom i to band, med meir enn 30 år millom første og andre bandet, og var skrive på latin – Rerum normannicarum fontes arabici (seinare omsett og utgjeve på norsk).
Han vart utnemnd til riddar av 1. klasse av St. Olavs Orden 1896, og til kommandør 1938."
Add a comment or suggest edits
To publish a public comment on the object, select «Leave a comment». To send an inquiry directly to the museum, select «Send an inquiry».