Å bora hol og sprenge stein kunne ein kvar klare. Fagarbeid som steinhogging kravde røynsle og kunnskap om steinen. Då som no var dette handboren kunnskap som berre kunne lærast på arbeidsstaden. Arbeidet var vanlegvis akkord, og arbeidslaget skulle helst bestå av godt vande karar. For å halda på fagfolka ynskte NSB at mykje som kunne vore bygd i anna material, vart bygd i hogd stein. Mange av svenskane ved anlegget var dugande steinarbeidarar.
Materialane var gratis og steinen langs Bergensbana var seig og god. Steinane vart hogde ut om somrane og frakta til byggeplassane etter at snøen eller isen hadde lagt seg. Stein frå Fagerbotn kan du beundre i dei vakre veggane i Fagernut vaktarbustad.