Prøv eit påskebroderi
Er du på jakt etter nye måtar å aktivisere familien gjennom heimepåsken? Prøv eit påskebroderi! Finn inspirasjon i desse påskemotiva frå 1950–80-talet, alle frå Oslo-firmaet Gunnar Pedersen AS.
Tekstilindustrimuseet har overteke bedriftsarkivet og tekstilar etter ei av dei store norske broderibedriftene i siste halvdelen av 1900-talet. Store delar av mønsterarkivet etter bedrifta er digitalisert, og er tilgjengeleg for alle broderiinteresserte. Mønstera er frie til ikkje-kommersiell bruk.
I over 70 år selde Oslo-bedrifta Gunnar Pedersen A/S (1915-86) broderimønster i butikkar og vekeblad som Allers, Norsk Ukeblad og KK. Jul og påske var også høgtidene i mønsterproduksjonen, og difor finn vi mange slike mønster i arkivet.
Etter kvart vart firmaet ein viktig leverandør av mønster, garn og broderiutstyr i Noreg, og fekk også eit omfattande kundenettverk i utlandet. Varemerka Design Gunnar P, Laila og St. Georg har sitt sett preg på norsk broderi og -handarbeidshistorie, men bedrifta er kanskje aller mest kjend for dei mange mønstera i klostersaum den lanserte på 1970-talet.