Alv Vilands lastebil vert henta opp av sjøen på Fjæra i Etne, 1937. I bakgrunnen er HSD si ferge "Tyssedal".

Tekst som fylgjer biletet:

"Dette biletet er frå året 1937 og knyter seg til ei hending som truleg mange enno hugsar.

Den gong var ikkje vegen Kyrping-Fjæra bygt og HSD sin båt Tyssedal gjekk i rute mellom dei to stadene, og båten frakta både passasjerar, bilar og anna.

Alv Viland køyrte den tid slakt for Hans Helgevold på Sandeid til Oslo. Han hadde denne dagen fullt lass med smalaskrottar på bilen, 200 stk., og om bord på ferja var det også 4 andre bilar med. Ved ilandkøyringa på Fjæra fekk ferja slagsida utover frå kaien, som førte til at Alv Viland sin bil glei ut forbi dekket og i sjøen. Neste dag vart bilen heist på land ved hjelp av dykkar. Kun éin kjøtskrott vart av dyrlegen kassert. Slaktar Melkeraaen i Odda kjøpte kjøtlasset for 90 øre pr. kg.

Per Rullestad var med bilen til Viland som passasjer og han hadde bunde skreppa si til skjermen på bilen - ei skreppe som var forunderleg både av utsjånad og innhald. Per møtte på kaien då bilen vart heist or sjøen og fekk skreppa si att. 1800 kroner som i skreppa var, var like turre og fine som før dukkerten."

-----------------------

Originalbiletet er eit gammalt fotografi, lånt frå ei privat samling og avfotografert av Endre Heggen i 1985. Endre Heggen var lokalhistorikar og sogelagsmann i Ølen. Han var fødd i Stavanger 5. august 1920, men flytta til Ølen i 1935. Far hans kom opphaveleg frå garden Heggjo i Ølen.

I vaksen alder byrja Endre Heggen å fatte interesse for kulturminne og kulturvern. Det starta med interessa for bygningskultur. Sidan tok han òg til med å samle inn gjenstandar frå Ølen og Bjoa. Frå midten av 80-talet gjekk han systematisk til verks med å intervjue og samle inn bilete frå folk i nærområda, og opparbeidde seg etterkvart ei vesentleg samling av både lydopptak og kopiar av gamle bilete. Samlinga vart sidan gjeven til Vindafjord kommune og er no del av Haugalandmuseet sine samlingar.

Fotografering - 1937

Produksjon - 1985