Kvalskrottfjell ved Kleven

Der Rallarvegen passerer Kleven ligg det ein berghammar på ei halvøy i Klevavatnet. Ho liknar ein kvalskrott med ein lang straumlineforma hale mot nord. Dette er isbreen sitt verk: breen, som var godt armert med harde granittsteinar i botnen, skura på den mjuke fyllitten. Mellom haugen og vegen er det fleire merke etter isskuring på mindre berghamrar. Her ser vi tydelege skuringsstriper i fyllitten. Hammaren har det vi kallar støyt- og leside, som fortel at isbreen strøymde mot nord. Lesida vart danna der smeltevatn rann ned i sprekker under isen, fraus til is att og sprengde med seg blokker som vart nytta i den vidare skuringa.