Kunstmålaren Harald Seim

Kunstmålaren Harald Seim

Av Magnus Torvanger

Kunstmålaren Harald Seim var fødd på Seim i Nordhordland i 1882. Faren hans Nils Larsson Seim kjøpte Kinn-øya i 1896 av Hans Christian Lass og flytta til Kinn med kona Kari og dei tre yngste sønene Magnus, Harald og Einar.

 På Kinn dreiv dei med tradisjonelt jordbruk og laksefiske med kilenot. Etter ei tid delte Nils øya mellom sønene slik at Magnus fekk innmarka ved kyrkja (Kinn ytre) og Harald og Einar fekk innmarka ved Kinnasundet (Kinn indre). Utmarka og lakserettane var felles.

 Harald og Einar slo seg ned i Kinnasundet der dei bygde seg hus og fjøsbygning i 1911.

Einar hadde mange boklege interesser, og det vart etter kvart han som dreiv gardsbruket.

Harald hadde kunstnarlege interesser og vart sterkt oppteken av kystnaturen med hav og fugleliv. Han starta tidleg å teikne og måle, og i tida 1909-17 var han elev ved det nyoppretta Statens Kunstakademi i Kristiania med Christian Krohg som læremeister. Han var også på studiereise til Paris, og han vart etter kvart heiltids kunstmålar. Harald Seim debuterte som utstillar i Bergen i 1911, på Høstutstillingen i Kristiania i 1912, og på den første Vestlandsutstillingen i Bergen i 1922. Han deltok fleire gangar på Høstutstillingen og han var med på Vestlandsutstillingen fram til 1938.

 I 1916 bygde han seg atelier i Kinnasundet. For å skaffe godt lys sette han inn to store vindauge som vart utskifta i Kinnakyrkja ved restaureringa i 1912. Motiva sine fann han gjerne på Kinn med Kinnaklova og sjøstranda rundt Kinn. Han var spesielt glad i å måle havbåra søm bryt mot land med ærfugl, måsar og ørn. Han er ofte kalla ørnemålaren. I yngre år måla han fleire fine portrett.

 Etter kvart reiste han mykje rundt i distriktet og måla. Spesielt godt likte han seg i Nordalsfjorden, Eikefjorden, Hyen og Ålfoten, der han budde i kortare og lengre periodar. Her fann han motiv som landskap med fossar og gamle stølshus, kvernhus og naust.

Ofte måla han etter bestilling, eller han måla motiv som han visste at folk likte. Desse måleria hadde ikkje alltid så stor kunstnerisk verdi, men han måtte også leve av kunsten. Han omtala bileta sine som kunst og kommers.

 Harald Seim var ein svært produktiv kunstmålar. Han laga kanskje så mange som 2.500 oljemåleri og kanskje like mange akvarellar. Såleis finst det eit stort tal bilete etter han, ikkje minst på dei stadane der han budde og arbeidde. Ellers er bileta spreidde vidt utover, og mange er ofte på auksjonar hos kunsthandlarar.

 Harald Seim døydde på Sandane i 1975 og er gravlagd på Kinn.