Steinen vart broten frå fjellet med eld og vatn. I avfallsdyngjene med rhyolittfliser som steinalderfolket let etter seg, har vi funne trekol som er radiologisk datert. Rhyolitten frå Siggjo var i bruk frå kring 4000 til 2000 år f.Kr. Vi finn han att på steinalderbuplassane som avfall, eller som øydelagde eller attgløymde reiskapar, gjerne pilespissar, skraparar og ymse skjerereiskap.

Utbreiing

Det meste av Siggjo-rhyolitten vart brukt i Hordaland og Nord-Rogaland, men funn er kjende så langt nord som til Kristiansund, aust til Bjornesplassen på Hardangervidda og til Lista og Lillesand. Dette særmerkte råstoffet frå Bømlo, som var i bruk i nær 2000 år, gjev såleis verdfull kunnskap om samhandel og samkvem mellom landsdelane i steinalderen.