Flåmsgjelet og utsikten frå Leina

I Flåmsgjelet går vegen på ei smal hylle der elvi har grave seg ned i fyllitt mellom Fureberget og Hagaberget. Litt lenger nede vidar dalen seg ut med utsikt til den opphavlege Flåmsbygdi. Dalen vidare nedover er asymmetrisk, med fyllitt og gamle fjellskred i den slakaste fjellsida under Ramnanosi (1 412 meter over havet) i aust. Her ligg fjellgardane Ryum og Indrelid på gamle skredmassar og det har kome skredtunger heilt ned til Flåmsbana. I vest er det bratte fjellsider i den harde gneisen i skyvedekket. Ved slutten av istida gjekk sjøen inn hit og havnivået var 135 meter høgare enn i dag. Det er terrassar frå denne tida på begge sider av dalen.