Knud Bergslien - målaren
Knud Bergslien (1828-1908) vart etter studieår i Dusseldorf lærar ved Eckersbergs målarskule i Oslo, og skulen vart etterkvart kalla Bergsliens målarskule, der heile generasjonar av norske kunstmålarar gjekk i lære. Sjølv var han ein framifrå portrettmålar, og nokre kjende målarstykke i norsk kunst er av han, som «Birkebeinerne på ski over Filefjeld fører Håkon Håkonson som barn til Trondhjem» (1869).
Brynjulf Bergslien - bilethoggaren
Broren Brynjulv Bergslien (1830-1898) vart etter studiar i København ein av dei fremste bilethoggarane i Noreg. Dei mest kjende verka hans er Karl Johan til hest framfor Slottet i Oslo og Henrik Wergeland i Studenterlunden. Gustav Vigeland var ein takksam elev hjå Brynjulv Bergslien.
Nils Bergslien - folkelivsskildraren
Nils Bergslien (1852-1928) var brorson deira. Han slo seg etter studieår i Oslo og Munchen ned i Eidfjord. Mykje av det han har måla, vart kjøpt opp av engelske og amerikanske turistar. Folkelivsskildring vart hans fremste genre.
Atelieret og huset til Nils Bergslien står framleis i Eidfjord sentrum nord for elveosen, og i Galleri Bergslien attmed Vøringfoss hotell i kan ein sjå eit rikt utval av Nils Bergsliens produksjon.