Sagbruk og trelasthandel
Også på Nysætersida av elva kom det seinare sag. Det var lågadelsfolk og deira etterkomarar som åtte sagrettane. Som elles i Sunnhordland var det på 16- og 1700-talet stor trafikk av skottar og andre som kjøpte trelast i Sagvågen. I dag er det Valvatnes trelasthandel som fører tradisjonane vidare i moderne former, men framleis finst det ei gammal oppgangssag her. Sameleis står det att ein møllebygning.
Eksporthamn for svovelkis
Frå 1865 til 1968 var Sagvåg eksporthamn for svovelkis frå gruvene på Øvre Lidabø. Kisen vart frakta med båtar gjennom Storavatnet for lagring ved kaien inst i vågen. Då A/S Stordø Kisgruber (skipa 1907) kom i gang med stordrift, vart det bygd jernbane til nytt kaianlegg på Grunnavågsneset ved innseglinga.
Skipsverv
På Jensaneset («et nes ved Saugvogen, hvor Jens Hanssøn hafuer sig tilbygslet et støcke», 1644) kom Otte Ottesen i gang med skipsverv i 1825. Det var starten til Ottesen Skipsbyggeri A/S, som frå hundreårsskiftet til 1960-talet bygde 214 nye trebåtar, m.a. redningsskøyta «Olav Østensjø jr.». Verksemda vart nedlagd ca. 1980, men det er planar om restaurering av bygningane. Området vil då få status som eit kulturminnemiljø.