Bømoen – Vestlandets største sandur

Litt før Ygre stasjon vidar dalen seg ut, og i dalbotnen ligg Bømoen med ein liten flyplass og ein nedlagd militærleir. Den store flata her er bygd opp av sand og grus som vart avsett under og framom iskanten, på slutten av istida for omlag 11 500 år sidan. Dette kallar me ei sandur. Nokre grusryggar er avsett i elvetunnelar under isbreen (såkalla «esker»). På Bømoen ligg det òg ei større daudistjørn (Ostjørni) der det hadde vore ein større isklump nede i grusen. Ein av eskerryggane byrjar rett nedanfor Rallarvegen, like etter garden Tundal. Bømoen er den største sandura på Vestlandet.