Dramatisk landskap
Turistvegen er bygd på sørsida av dalen. Han går gjennom lauvskog og store urder under den dramatiske fjellsida og stig brått i hårnålssvingar ved Rjukandefossen. Utsikten ned i juvet her er sugande. På Svelgarhaugen var det i turisttida kafédrift; vi ser her spor etter husmurane. Ved Lonena fører ei fin og solid trebru over elva til bilvegen. Brua er rehabilitert. Vegen vidare går om lag langs same trasé som turistvegen og gangvegen tidlegare. Fram til 1932 var dette den einaste kjerrevegen til Skjeggedal. All transport til damutbygginga gjekk på taubaner og langs denne vegen.