Thorbjørn Lekve (1845–1897) hadde ein lang karriere som utdanna ingeniør, og var overlærar ved Christiania Tekniske Skole frå 1877, før han seinare vart utnemnd til sjef for Arbeidsdepartementets tekniske revisjon i 1891.
I 1894 vart han den første overingeniøren ved Bergensbana, med ansvar for vestsida av fjella, etter at han lenge hadde vore ein ivrig forkjempar for denne bana. Han var mellom anna til stades på debattane i Stortinget, og spelte nok ein stor rolle når det gjaldt å overtyda politikarane om at snøutfordringane i fjellet var mogelege å overvinna. I byrjinga kjempa han for ein trase om Ulvik og deretter opp til Taugevatn, men det vart traseen frå Voss og til Taugevatn som vi kjenner den i dag som vart vedteke. Lekve starta og leia finstikkinga av bana, og han starta også snømålingar langs traseen.
Thorbjørn Lekve døydde berre 52 år gammal i 1897, fleire år før han fekk sjå resultatet av plan- og stikkingsarbeidet han starta. Den Norske Ingeniør- og Arkitektforening heidra han med ein bauta på Finse som vart avduka i 1908 av banedirektøren sjølv, August Fleischer.
Overingeniør Harald Skavlan tok over ansvaret som overingeniør for vestsida av fjellet etter Lekve.