Røyrgata er laga av jarn og sett saman av mange røyrdelar. Før montering av røyrgata måtte fjellparti skytast vekk og fjellsida reinskast. Anleggsarbeidarane bolta fast stigar og stillas til fjellet og sikra seg med tau og enkle plattformar. Deretter kom skinnegangar og taubanar for transportanlegg på plass, det vart sett opp enkle trappetrinn i røyrtraséen og støypt fundament. I bratt terreng, med ein høgdeforskjell på 400 m og 60 graders helling på det brattaste, vart den øvre halvdelen av røyra klinka saman for hand. Ein arbeidar hang i tau inne i røyret, og ein utanfor. Arbeidarane si einaste sikring var taua som knytte dei saman med arbeidskameratane. Det var eit farleg arbeid på snø- og iskledde fjellveggar. For å få røyra opp i fjellsida, var ein avhengig av elektrisk kraft til å driva taubane og trallebane. Bana vart lagt samstundes med røyrmonteringa i 1907. Trallebana var i bruk fram til røyrbrotet i 1980 då nedste del av skinnegangen vart skylt vekk. Eit midlertidig kraftverk nedst i Sjoarfossen i elva Tysso kom i drift frå våren 1907 og leverte straum til trallebana. Tyske Thyssen leverte dei to første røyra, som hadde ei lengd på 730 meter, og Moss Mekaniske Verksted monterte i 1907-08. Røyrdelane vart tekne i land med kran frå båtane og lagra ved kraftstasjonen, lagt på ei tralle og køyrd på plass frå skinnegangen.
Add a comment or suggest edits
To publish a public comment on the object, select «Leave a comment». To send an inquiry directly to the museum, select «Send an inquiry».