Dei falne

                   Ørnulv Slåttelid (1919 - 1942)

                   Harald Slåttelid (1895 - 1943)

                   Thor Espelid (1918 - 1943)

                   Ingolf Kleppestø (1901 - 1943)

                  Olaf Prestegård (1912 - 1943)

                    Knut Veka (1902 - 1943)

                    Arthur Berg (1890 - 1943)

                    Leif Kindem (1900 - 1943)


    Falt i kampen for et fritt og selvstendig Norge.

Hausten 1942 gjorde Gestapo ei rekke arrestasjonar i Odda og Tyssedal. Nokre av fangane vart transporterte til Tyskland, sju vart heldne att på Grini ved Oslo.

Fangane vart av nazistane dømde til døden for "Bolsjevikisk undergravingsarbeid og virksomhet for en fiendtlig stat. De dødsdømte kommunister har forsøkt å forøve terror- og sabotasjehandlinger og gjort seg skyldig i utbredelse av bolsjevikisk propagandamateriell. De planla å danne kommunistiske celler på noen steder i Norge". Ein oppdikta dom, meir ein maktdemonstrasjon frå nazistane.

Dei sju frå Odda vart avretta i Trandumskogen på Grini 1. mars 1943. Eksekusjonen gjekk føre seg ved skyting.

23 år gamle Ørnulv Slåttelid (eller Ørnulf) høyrde med til dei falne, men hadde allereie fått ein litt annan skjebne.

Natt til 18. mai 1942 vart Ørnulv arrestert då Gestapo utførte ein razzia i ei leilegheit i Oslo. Han døydde same dag. Torturert i hjel på Møllergata 19 i Oslo.

Familien i Odda fekk høyra om det ein månad seinare. Ein slektning hadde sett urna med namnet Ørnulv Slåttelid på i eit krematorium. Mor til Ørnulv reiste til Gestapo sitt hovudkvarter i Oslo - Victoria Terrasse - og forlangde å få utlevert urna. Etter ei kraftig overhaling frå Gestaposjefane fekk ho urna.

Familien oppbevarte urna heime hos seg i tre år før dei sette henne ned på Berjaflot gravplass saman med dei andre falne etter krigen.

Dei dødsdømde sat saman på dødscella på Grini - også kalla Fallskjermen. Kvelden før avrettinga skreiv dei saman ei siste helsing:

Til kameratene på Grini. Vi sender dere alle vår hilsen. Den nasjonale front mot fascismen som er bygget opp i Norge, må dere underbygge og forsterke. Vårt mål og deres mål er et fritt og selvstendig Norge hvor nordmenn skal styre og skape lyse og levelige vilkår for alle. I kampen for dette må alle uoverenstemmelser skyves til side. Ut av vårt land med tyskere og Quislilnger. Leve et fritt og selvstendig Norge. Leve de som i dag kjemper for de undertrykte folks frihet.

Underskrive av alle sju.

Dei etterlatne fekk nyhenda frå avisene.