Den tradisjonsrike skoen ligna på mokasiner, noko som ikkje var tilfeldig. Mannen som kom på ideen og starta produksjonen i Aurland på slutten av 1800-talet, Nils Gregoriussen Tveranger, reiste nemleg til Amerika for å lære skomakaryrket saman med faren allereie som 13-åring i 1877. Der henta han inspirasjon frå indianaranes mokasiner, som han tok med seg heim til Noreg. Den norske utgåva fekk namnet frå staden der den vart produsert, Aurland i Sogn. Skoen vart snart populær, ikkje berre i Noreg, men i heile verda. I toppåret 1959 vart det solgt 100 000 par.
Nils Gregoriussen Tveranger vart fødd 27. februar 1874 i Solund i Ytre Sogn av foreldra Gregorius Gregoriussen Tveranger og Inger Uriasdatter. Då Gregorius vende heim frå Amerika i 1894 busette han seg i Aurland. I folketeljinga 1900 finn vi han på garden Ohnstad saman med kona Hansine Toraldsdotter Ohnstad og sonen Gustav. Nils er oppførd med ”skomager for egen regning” som yrke, men i tillegg er han og ”fisker”. Arbeidet som skomaker ga altså ikkje nok inntekt, og det vart naudsynt med fiske som attåtnæring. I 1910-teljinga er familien busett på Vangen i Aurland. Her er Nils berre oppførd med ”skomaker” som yrke. Nils og Hansine fekk fire born; Gustav (f. 1898), tvillingane Sofie og Hans (f. 1901) og Janna (f. 1910). Sofie døydde allereie i 1916.
Nils Tveranger døydde 13. juli 1953 heime i Aurland, Kona hadde døydd av ”hjærtelæmmelse” tjue år i forvegen. Han etterlot seg tre myndige born.
Sjølv om Aurlandskoens far er borte og storheitstida for skoen for lengst er over, fins det framleis spor etter Nils. I dag er nemleg den einaste skofabrikken som er att i Aurland, drive av femte generasjons etterkommar etter Nils Tveranger.